يا هو الكَـالك بالخيم شبت نار
وعيون العقلية التحرس الخيمه
صح ركضت أمية بالزلم والخيل
سوده الأكَـبلت سم تمطر الغيمه
الحرة اتعصبت لبست عباة حسين
صاحت ياعلي وانفضت الجيمه
هيبة حيدرة اباب الخيام اتلوح
من يكَـحم عيها وكَـدر يوصلها
شالت سيف أخوها وركبت الميمون
رجف عرج الهواشم من يجابلها
بدرع عباس غارت .. شمس تاكل ليل
وبحافر المهرة الزلم تركلها
تزأر بالكتايب يالثار احسين
عاليها انسحكَـ وانكَـلب سافلها
مرعوب ايترادم جيش ابن سفيان
من الخوف الزلم ذبت محاملها
خذت ثار الأخو والأهل والأنصار
ولو تدري اشخذت عن ثار كافلها
يمنتها علي .. وعل الميمنه تنخاه
والحمزة اخذها الميسره مكافف
وقلب المعركه الحوراء واحسب هاي
لو شالت اديها الكون يتراجف
حرة .. وبت علي .. والهاشميه اتفور
وتشوف اخوته موته والعدى اتهوس
تنذل للسياط وتنجتف عنوكَـ
وعيون الأقزام بطول عزها اتمس
لو تلبس درع وتكَـود عزراين
وبحلكَـ المنايا من الأنذال اتعس
صاحت ياعلي .. وكزبر جلدها الكَـاع
زلم واحد للآخر .. ولك اسكت اس
مدري اشصار كَـامت تخذف الفرسان
وظلت بصدور اكَـلوبهم ترفس
مثل نفض البسط .. نفضت الحرة الكَـاع
وتشمرها وترد برجل تطويها
تكَـطع هل اليماعه وترد تكَـطع هاي
مناحه اعله العدو وفرحت اهليها
وجفوف الكَـمر عل المشرعه ملوحات
حي الله العقيلة وحي طواريها
جف شايل الرايه وفات للميدان
وجف شايل الجود ايريد يسقيها
زينب فارس الطف وارد اثبت هاي
موكلفه وعلي اعل الزود رباها
ما تلحكَـ عليها اجفوف عزراين
شمرت سيفها التسبكَـ مناياها
حاصودة اركَـاب اخت البطل عباس
تحش بالروس والتسحكَـ نثاياها
كَـد ما طيرت بالروس سويت غيم
يمطر ثارها ويروي بيتاماها
لتكَـلي مرة فارس اشلون اتصير
جم حرمة الفعل بالزلم ساواها
والشاهد صفية وراجع التاريخ
وافضل من صفية الحرة تلكَـاها