يمحمد بويه محمد
زرعنا الحب شو ما ......؟؟؟)
شو كله تفرهد ...؟؟؟
وانباگت سكته اللحظات
مخنوگة الروح
بعبرتها
ومحتارة العين
بدمعتها
ومشدوهة بحلگي الچلمات
مدري اصدگ
مدري اچذب
يمكن احلم ؟؟
لو متوهم ؟؟
بس ظل صوت الناعي يردد ...
محمد مات .... محمد مات
******
( يمحمد بوية محمد
زرعنا الحب شو ما .........؟؟)
شو كله تفرهد ؟؟؟
وانباگت سكته اللحظات
يمحمد شو هرفت الروحه ؟؟؟
وبعده الليل مكوم جروحه
وحروفك ظلت مطروحه
وجنت الگمر
بأيد تلوحه
وبأيد تصفط النجمات
بعد عيونك ياهو الالهن؟؟
يسهر بالليل يغازلهن
ولمن خيط الفجر يلالي
يجمعله گلاده من اجملهن
يهديها لاحلى الحلوات
محمد مات .... محمد مات
وتاهت وي موته النجمات
*****
(يمحمد بوية محمد
زرعنا الحب شو ما .........؟؟)
شو كله تفرهد ؟؟؟
وانباگت سكته اللحظات
يمحمد چنك مستعجل
شنهي الصار ..؟؟
تانيني التمسك لاتبعد
لحضة تمهل
خل نگعد بس اخر مره
اباب الدار
كتبت وياك شگد اشعار
وشگد مرينا بصفنات
شگد عاندنا الماي اليجري
وسبحينا بضد التيار
وچانت سولتنا من اندخن
نرسم بالدخان گلوب
وبنصها اسماء النعشگهن
تتذكرهن ؟؟؟؟
نوره الشگره
وام اعيون السود ازهار ؟
وآخرهن جانت آيات ...
تذكر لمن واعدناها ؟
اواحد مايعرف بالثاني
ومن تلاگينا بموعدها
تذكر ويامن شفناها ؟
وشگد ضحكت من شافتنا
ومن ذاك اليوم تعاهدنا
بيني وبينك ماكو اسرار
چا ليش تضم موتك عني ؟؟؟
ومن ترحل تنسى تودعني
وتخليني ويه الاهات
اسمع موتك بالاخبار
محمد مات ..... محمد مات
*******
واخر مرة شفت محمد
چان مفتح على باب الله
بسوگ الجمعه
فارش كل كتبه عله الگاع
وشفت ثلث اطفال بصفه
اولهم يحلمله بلفه
وازغرهم غالبته الغفوة
والثالث يسأل متحير
شو ما باع ؟؟؟؟
ومحمد مشدودة عيونه
على كل واحد يوصل يمه
وعلى كل واحد مر وفات
گتله محمد :
مو ديوانك هذا الاول ...؟؟؟؟
مو خطيته انه وياك ؟؟؟
هز ايده وجاوبني بحسره
گلي شمالك
شو متشوف
جوع اطفالي
ابلغ من كل الكلمات
محمد مات .... محمد مات
وتاهت وي موته النجمات

اخي حيدر والله اتئثرة بالموضوع مالتك لان اكو هواي شباب راحو بدون اي ذنب يقتلون الابرياء ويقولون مقاومة الله واكبر على كل من طغى وتجبر

موضوع مؤثر جدا

رحمه الله .. ورحمنا

تحياتي