ياعلي الاكبر ياوليدي

ِاِلولي وطيفك اكبالي وادري بالمهد خالي

مشتاكه اناغيلك يوليدي والوليلك
وادري بالمهد خالي
.................................................. ...........................
ازيح استار موتك واخلف اضنوني
ما صدك تروح ابعيد من دوني
واكابر عل الحقيقه واطبك اجفوني
بالجن بالحلم تتلاكه بعيوني
واسولفلك قصص دمعي يل فكدك كسر ضلعي
جبرني الشوك احجيلك يوليدي والوليلك
.................................................. ..........................................
ادثر امجان نومك واخنك انفاسي
اخاف اتفز يبعد الشيب البراسي
واناغيلك ييمه بروحي واحساسي
واوكفلك حرس وادموعي حراسي
الوليّ والجفن واعي لمن تغفه عله ذراعي
تضل عيوني تربيلك يوليدي والوليلك
.................................................. ..........................................
افز بالليل وتناغيني اسمعنك
وامد ايدي اعله مهدك واهزنك
واتذكر انبال الشام ذبحنك
ادور وين طيفك حته اشوفنك
تبجّي الليل فزاتي وتصفن الكون صفناتي
دموع دموم اجريلك يوليدي والوليلك
.................................................. .........................................
ادور والجدم يتعثر ابممشاي
ومثل اخيالي حسراتي تمشي وياي
يسهم الماي دليني يسهم الماي
انه امضيعه الولد والراح مني اهواي
شلي بعمري انه بلياك يالرايح اخذني وياك
زحف عالنار امشيلك يوليدي والوليلك
.................................................. .........................................

الولي والدمع يا يمه يبرالي
واهزن بالمهد وادري بالمهد خالي
واكول اتعود ليه وتكعد اكبالي
وابجي اعليك مدري لو عله حالي
عله فراكك انه شبيدي وعلي مكتوب يوليدي
بتوالي الليل انعيلك يوليدي والوليلك
.................................................. ..........................................
اهز مهدك وناغيلك يبعد الروح
دللول الولد يبني بمهد مذبوح
ليش تروح عن عيوني ليش تروح
انه بلياك كلي جروح كلي جروح
تسع اشهور احملنك وبعد ارباي افكدنك
انه بياطورابجيلك يوليدي والوليلك
.................................................. ..........................................
انه مضيعه الولد واتناه ليه ايعود
ما ابجي بدمع واطيح مني جبود
تصد عيني المهد وتشاهد المولود
اكلهم هاذ كالو لا ما موجود
اكلهم ساجن بروحي وابد ما بطل بنوحي
واظل انعه والبيلك يوليدي والوليلك
.................................................. ..................................
نسالكم الدعاء والفاتحه/علي صادق حسون(ابوسجاد المجراوي)