((رسالتي الى الدول الطائفية ))
القصيدة التي القيتها في مهرجان (المصالحة الوطنية)
في بغداد قبل حوالي اكثر من شهر والتي كتبتها قبل
سنتين اتمنا ان تنال اعجابكم مع مودتي
.................
بدت وي الــدول ساعات الحساب
واريد اسال وجاوب عن سؤالي
بكثر ما سلمت للارصــفة ايــــتام
عزرائيل دنكلي وبجالي
مـــــنو منكم اجاني وكال شتريد
وابشر والسدى عليكم سدالي
منـــو منكم اجاني بساعة الضيج
بوكت بي حتى جتالي انتخالي
اشــــو محد وكفلي وصاح عيناك
نسائي الدين عدكم لو رجالي
عـلى مسرح ركبنة يمثل السيف
فنان واخذ مشهد خيالي
مــــشهد للــذبح وانتم كـــتبتوه
بقلم مستورد وفنه ارتجالي
مـــــــلتمين جنة وبيتنة الــــوان
سني وشيعي ما بينة اليغالي
طــب اي بيت من توصل لتكريت
مثل ما جنك اطب لعيالي
لــــتغركم اصــــوات الانــفجارات
سمفونية صارت عد جهالي
بغير اصواتهن شنسوي بالــموت
رخيص الموت واني انسان غالي
وابـــــشركم بعد ما نعرف النوم
وقعنة عقد وي الليالي
ومو بس هاي عدنة وي الهوى زماط
الما يترس خشمنة انردة خالي
العراقيين جمرة ومن تهب ريح
الجنوبي يهب اذا صاح الشمالي
احنة ارجال كلفة وما نطخ راس
الكصير البينة اعلى من الجبالي
افا ولو حرمة صاحت وين الاولاد
يطم روحة اليضن بروحة عالي
هذولة احنة الدرب يعشكنة خطوات
حوافر خيلنة اتدوس النبالي
واذا يطفى الكمر بعيون عشاك
نصعد على امتونة نشغلة الي
عاين بالافق من يطلع القوس
عدل بس شافني وذل وانحنالي
ويسالني الغشيم تصيح شبيك
وعليمن يحرك اعصابك سؤالي
اذا اشوف العراق الذيب والشات
مو حكي اذا اصير انفعالي
عمر الطين ما فارك حجي الماي
ولا يكعد الماي بدون جالي
الشيعة وسنة مثل الماي والطين
القرالك طائفية هم قرالي
اشبعد يالددول عدكم من مفاهيم
لو بيكم رجل جان انبرالي
انا وادم وكفنة على الارض نوط
بزمن ماكو بشر والكون خالي
وانا براسي انبنت ذيج الحضارات
وفكرها العايش بعالم خيالي
عراقي ومن اكول اني وعلي تشوف
اوائلكم يضيعون التوالي
عراقي وشلت بذراعي انتصارات
بدية وما كلت واحد حجالي
انا السني وكت ما صار الازماط
جم شيعي الاجة ومات بدالي
......
((عقيل الشيباني))

الله الله على الكلمات القمة في الروعة
باركك الله
ابدعت
تحياتي لك