مانسانه لأحمد العتابي العراقي

ماحوانه

وعنه سد بيبان اذانه

حتى لا يسمع بواچي ايتام ولده
الرادته ايلمها ابحنانه

حتى لايسمع ونين اتراب گاعه
وضحكة اشماتة زمانه

ما عرف شنهي النريده
يجوز موطنه نسانه

ابليله تيهنه دربنه
والاجدام ابحيرة تنشد
ابيا كتر غافي ضوانه

وما لگانه
ولا سمع حتى ندانه

بطين حرّي سد اذانه

وحتى شوفه
ما رضه ايردّه لمچانه

خاف يلمح دمعة بعيون الارامل
خاف يلمح غصة بصدور السنابل
خاف يلمح طفله ما عدها ستر
وتگله متسلِّب ردانه

ماله حيل ولا له قدره
ايشوف ستره

ابِّين نيبان الذيابه
الترگص ابنغمة مصابه
بحضن ربّان الخيانه


غربة صار النه وطنه
بيه يبس هرش المحنه
والفگر عاين رگبته .. ونبّت ابنصها سنانه

ايشوفنه ابحر النوايب
موج عصراته خذانه

ما فزع مچتوف عزمه
چيه رضه الما عدها غيره
وهو ابو الغيره تحكمه

چيه رضه الما عدها امانه
ايامن ابسدها امانه

ضاع صوته
واختنگ حيله ابنهضته
وظل يدور اعله اسمه موته ..
الباگ من حضنه ضحكته

ويا حسافه ..
امخورسه اچفوف المنايه
اليحتضر بيها كيانه

وين مهوال العزيمة
غصّت الهوسه بلسانه

وين خيّال الحميّه
العمره ما خيّب رجانه

وينها اچفوف النزاهه
الـ بالبخت ترفع لوانه

ما اظنها تصح نسانه

الوطن والد
ما يذب ولده اعله باب الما يعرفون الشهامة
هو والد للكرامة
اعله المحاسن علّمانه

ما نسانه
ومو صدگ صك باب اذانه
وچان يسمع زين ما يعني ندانه
وجان يعلك عمره شمعه بليلنه وينده ضوانه

هاي اوهام الخديعة
الرادت اولاده تبيعه
ومن تسولف عن وطنها
تگول موطنه نسانه

لازم ايعود لمچانه
وگاعه ترجع للعطاء
وتبزل البيهم خيانه
ابسيل نهران المهانه

وبيه ترد ضحكة سمانه

وترجع الدنيه تبوس ايده
ويظل مرفوع شانه